Дарынды оқушылармен жұмысты цифрландыру: ұлттық платформа құрылады
Дарынды оқушылармен жұмысты цифрландыру аясында ұлттық платформа құрылып жатыр. Бұл туралы «Дарын» республикалық ғылыми-практикалық орталығының директоры Гаждембек Тұрсынов айтты.
— Қазіргі уақытта дарынды оқушылармен жұмысты цифрландыру мәселелері қолға алынып жатыр. Мысалы, Smart Daryn ұлттық цифрлық платформасы құрылып жатыр. Бұл жоба мектептер, мұғалімдер мен оқушылар арасындағы өзара әрекеттесуді жеңілдету, білім беру ресурстарына тікелей қолжетімділікті қамтамасыз ету және білім беру процесіндегі байланыс сапасын арттыру тұрғысынан маңызды қадам болмақ, — деді ол ОКҚ алаңында.
Сондай-ақ спикер дарынды балалармен жұмыс істейтін педагогтерді де қалыптастыруға мән берілетін айтты.
— DARYN ALUMNI қазақстандық жаттықтырушылар пулын дамыту жалғасады, бұл ерекше қабілетті балалармен жұмыс істеу үшін жоғары білікті мамандарды тартуды қамтамасыз етеді. Осы бағытта халықаралық олимпиадаларда жоғары нәтижелерге қол жеткізген мектептердің табысты тәжірибелерін таратуға көмектесетін ассоциациялар құрылады, — дейді Гаждембек Тұрсынов.