Елордада автобус жүргізушілерінің әрекетін камера арқылы бақылайды
Астанада қоғамдық көлік жүргізушілерінің әрекетін бақылау үшін бейнебақылау камералары орнатыла бастады.
— Қоғамдық көліктер жүргізушісінің әрекетін бақылауға арналған бейнебақылау камералары орнатылды. Енді барлық автобусты қамтуды жоспарлап отырмыз, бұл жүргізушінің телефонға алаңдамауын бақылау үшін қажет, — деді Астана қаласы Полиция департаментінің әкімшілік полиция басқармасы жол-көлік және техникалық инспекция бөлімінің аға инспекторы Мақсат Имашов елордадағы кәсіпкерлер палатасы алаңында өткен іс-шара барысында.
Оның айтуынша, полиция қызметкерлері күнделікті патрульдеу кезінде қоғамдық көліктердегі бейнебақылау камераларының жағдайын тексеріп тұрады.
— Одан бөлек, автобус жолға шығар алдында қоғамдық көліктің техникалық жағдайы тексеріліп, бейнебақылау камерасының да жұмыс істеп тұрғаны қаралады, — дейді ол.
Айта кетсек, елімізде қоғамдық көлік иелері автобус ішіне камера орнатуға міндеттеледі.