Халықтық штаб: Реакторлық қондырғылардың қауіпсіздігі жаңа деңгейге көтерілген
Ақтауда АЭС құрылысын қолдау жөніндегі облыстық халықтық штаб өкілдері «Oil Construction Company» ЖШС ұжымымен жүздесті.
Штаб мүшелері мұнайшылармен кездесуде Мемлекет басшысының халыққа Жолдауын, АЭС салу арқылы атом қуатын игерудің ұтымды тұстарын талқылады, деп хабарлайды халықтық штабтың баспасөз қызметі.
Мұнай өнеркәсібінің еңбеккерлері АЭС-ның қоршаған ортаға, халықтың денсаулығына әсері, Чернобыль және Фукусима сияқты апаттардың қайталану қауіпі, атом электр станциясы құрылысы жөнінде сауалдар қойды.
Штаб мүшелері АЭС-тің қоршаған ортаға қауіпсіз екенін, ғалымдар ірі жылу электр станциясы
аймағындағы жеке сәулелену дозалары атом электр станциясының
жанындағы ұқсас дозадан 5-10 есе артық екенін эксперименталды түрде
анықтағанын түсіндірді. Сондықтан ядролық энергия «жасыл» деп танылған.
- 1986 жылы Чернобыль атом электр станциясында және 2011 жылы Фукусима-1 атом электр станциясында болған апаттардан алынған сабақ және басқа да оқиғалар жаңа реакторларды жобалау кезінде ескеріледі. Осы апаттардың әсерінен атом энергетикасының қауіпсіздігі жаңа деңгейге көтерілді. III+ буын реакторларының конструкциясына қосымша қауіпсіздік мүмкіндіктері қосылды. Мамандардың мәліметінше, III+ буынының көптеген ядролық реакторларда балқыма тұзағы қарастырылған. Егер жанармай қаптамасы мен реактор қалыбы және онымен байланысты құбырлар еріп кетсе, балқытылған материалды ұстайтын және оны салқындату мүмкіндігі бар өзек ұстағышқа түседі. Бұл өз кезегінде соңғы кедергіні – герметикалық қабықты қорғайды, - дейді штаб мүшесі Анар Шамшадинова.