Қорғаныс ведомствосындағы жүйелі өзгерістер: жаңа шешімдер нені көрсетеді?
Саясаттанушы Данияр Әшімбаев Қорғаныс министрлігіндегі соңғы кадрлық өзгерістерге қатысты пікір білдірді.
Оның айтуынша, Каспийдегі қайғылы оқиға әскери ведомстводағы жағдайды жан-жақты тексеруге түрткі болған.
«Мемлекет басшысының берген бағасына, одан кейінгі жаппай отставкалар мен қамауларға қарағанда, Қорғаныс министрлігіндегі жағдайдың айтарлықтай күрделі болғанын аңғаруға болады», – деп жазды Данияр Әшімбаев.
Саясаттанушы Президенттің Қорғаныс министрі мен Бас штаб бастығы қызметіне Мемлекеттік күзет қызметінің Арнайы мақсаттағы күштерінде тәжірибе жинаған офицерлерді тағайындауына да назар аударды. Оның пікірінше, бұл шешімнің өзі көп нәрсені аңғартады.
Әшімбаев сондай-ақ Қорғаныс министрінің орынбасары қызметіне Татьяна Савельеваның тағайындалуына тоқталды. Оның айтуынша, Савельева – қаржы саласында мол тәжірибесі бар маман. Ол ұзақ жылдар бойы Қаржы вице-министрі қызметінде бюджет мәселелеріне жетекшілік етіп, кейін Мәжілістің Бюджет комитетін басқарған.
«Ол биыл тамыз айында ғана жаңа Құрылтайдың депутаты болған еді. Алайда Қорғаныс министрлігіндегі жағдайды ретке келтіру қажеттілігі бұл жағдайда маңыздырақ болып отыр», – деп атап өтті саясаттанушы.
Данияр Әшімбаев Қорғаныс министрінің экономика және қаржы мәселелеріне жауап беретін азаматтық орынбасары қызметінің тарихына да тоқталды. Оның мәліметінше, бұл лауазым Қазақстанда 1999 жылы енгізілген. Оны алғаш Госман Әмрин атқарған. Кейін бұл қызметте Жаннат Ертлесова, Қозы-Көрпеш Жанбыршин және басқа да мамандар жұмыс істеген.
Саясаттанушы бір кезеңде Ішкі істер министрлігінде де осындай қызмет болғанын еске салды. Бұл бағытқа кезінде Болат Жәмішев жетекшілік еткен.
Әшімбаевтың пікірінше, Қорғаныс министрлігіндегі проблемалардың бірі – сыбайлас жемқорлыққа қатысты даулардың тұрақты түрде туындауы.
«Кей жылдары бірнеше генералдың бірден қамауға алынған кездері болды. Әңгіме мемлекеттік сатып алулар, кадр мәселесі, материалдық-техникалық қамтамасыз ету және басқа да бағыттар туралы», – деді ол.
Оның айтуынша, саяси басшылық бұған дейін де Қорғаныс министрлігіне тәжірибелі азаматтық басқарушыларды тартып отырған. Олар министр немесе экономика, цифрландыру, қорғаныс өнеркәсібі бағыттарына жауап беретін орынбасар ретінде қызмет атқарған.
Данияр Әшімбаев қазіргі жағдай Қорғаныс министрлігінде қайтадан қатаң әрі жүйелі шешімдер қабылдауды талап ететінін атап өтті.
«Қаржы саласын жақсы білетін, принципшіл маман Татьяна Савельеваны осы қызметке жіберу – қазіргі жағдайда дұрыс шешім», – деп түйіндеді саясаттанушы.