Шымкентте ең биік ту 100 метрлік биікке көтерілді
Қаз. 25, 2024, 6 Т.Қ.
Шымкентте Республика күніне орай қаладағы ең биік ту тұғырына мемлекеттік ту көтерілді. Биіктігі — 100 метр.
Салтанатты рәсімге мегаполис әкімі, қалалық мәслихат депутаттары, құқық қорғау органдарының басшылары, атақты спортшылар, БАҚ өкілдері және қаладағы жастар қауымы қатысты.
Қала тұрғындарын айтулы оқиғамен құттықтаған қала әкімі Ғабит Сыздықбеков «Tulip Hall» кешенінің жанында орналасқан жаңа мақтаныш пен бірлік нышаны қала тұрғындары мен қонақтары үшін тағы бір сәулет нысанына айналатынын атап өтті.
Көлемі 30×15 метрлік үлкен туды қаланың әр нүктесінен көруге болады. Салтанатты шараға жиналған тұрғындардың айтуынша, көкке көтерілген ту бірлік пен мақтаныш сезімін тудырып, баршаны бір ту астына жинайтындай әсер қалдырады.