8 наурыз мерекесіне орай түркістандық көпбалалы аналар бір реттік көмек алады
Республика бойынша көпбалалы аналардың төрттен бір бөлігі Түркістан облысында тұрады.
Көп балалы аналардың 117 927-сі – 18 жасқа дейінгі төрт және одан көп баласы бар аналар болса, 2175-сі «Батыр аналар». Сондай-ақ, өңірде 18 570 «Алтын алқа», 43 413 «Күміс алқа» иегерлері, 3264 I және II дәрежелі «Ана даңқы» орденімен марапатталған аналар бар.
8 наурыз – Халықаралық әйелдер күніне арналған мерекелік іс-шаралар жоспарына сәйкес, өңір тұрғындарының әлеуметтік аз қамтылған бөлігін, көпбалалы және толық емес отбасыларға қаржылай және заттай қолдау көрсету жоспарланған.
Мереке қарсаңында «Алтын алқа», «Күміс алқа» иегерлері, «Ардақты ана» атағын алған, сондай-ақ I және II дәрежелі «Ана даңқы» орденімен марапатталған көпбалалы аналарға бір реттік көмек қарастырылмақ. Аудандық және қалалық бюджет есебінен жалпы 63 мыңнан астам адамға 484,8 млн теңгеге жуық қаржы қаралып, орташа есеппен 7864 теңгеден біржолғы материалдық көмек көрсетіледі.
Айта кетейік, бүгінгі таңда облыс бойынша 31 933 адам немесе 5265 отбасы атаулы әлеуметтік көмек алады. Оның 62 пайызы немесе 3252-сі көпбалалы отбасы.
