Алматы емханаларында жыл соңына дейін толықтай Face ID жүйесі енгізіледі

Алматы әкімдігінің мәліметінше, Face ID технологиясы медициналық есептің ашықтығын арттыруға мүмкіндік береді. Бұл жүйеден бөлек емделушілер медициналық мекемеге барғанын «Сандық құжаттар» қызметінің алты таңбалы коды арқылы растай алады.

Қазіргі уақытта Face ID қалалық емханалардың 70%-ында қолданылады. Жыл соңына дейін жүйе Алматының барлық емханаларында енгізу жоспарланған.

— Денсаулық сақтау саласына цифрлық технологияларды енгізу — бұл медициналық қызметтердің сапасын арттыруға бағытталған қадам. Face ID емдеуді тағайындау, амбулаториялық дәрі-дәрмекпен қамтамасыз ету үшін рецепт жазу кезінде маңызды. Біз қала тұрғындары үшін медициналық қызметтерді қолжетімді әрі ыңғайлы ету үшін алғашқы медициналық-санитарлық көмекті цифрландыру бойынша жұмысты жалғастырамыз, — деді Алматы қаласы Қоғамдық денсаулық сақтау басқармасының басшысы Әсия Ақанова.