Алматыда жедел жәрдем көлігіне жол бермеген жүргізуші жауапқа тартылды
Жүргізуші Әкімшілік Кодекстің 598-бабы 1-бөлігінің талаптарын бұзған.
Әлеуметтік желіде жеңіл көліктің жедел жәрдем көлігіне жол бермеген бейнежазбасы тарады.
Полиция департаментінің мәліметінше, оқиға 22 сәуір күні сағат 15:30-да Трудовая және Әшімов көшелерінің қиылысында болған.
- Toyota көлігінің жүргізушісі арнайы шамдары қосылып тұрған жедел жәрдем көлігіне жол бермей, Қазақстан Республикасының Әкімшілік құқық бұзушылық туралы Кодексінің 598-бабының 1-бөлігінің талаптарын бұзған. Жергілікті полиция қызметкерлері әйелді әкімшілік жауапкершілікке тартты. Оған қатысты алдын алу, түсіндіру жұмыстары жүргізілді, - деп хабарлады департаменттен.
Қалалық полиция жедел тапсырмаларды орындайтын көліктерге қатысты жүргізу тәртібін сақтау тек заң талабы ғана емес, адам өмірінің мәселесі екенін ескертті.
