Әскерде жүрген сарбаздың несиесін тоқтату үшін ата-ана не істеу керек – министрлік жауабы
Әскерде жүрген сарбаздың несиесін тоқтату үшін ата-ана не істеу керек? ҚР Қарулы күштері Бас штабы Ұйымдастыру және жұмылдыру жұмыстары департаменті Әскерге шақыру және әскерден тыс жұмыстар басқармасының аға офицері Дәуренбек Шегебаев әлеуметтік желідегі тікелей эфирде осындай сұраққа жауап берді.
- Әскерге шақыртылған азаматтардың несиесі автоматты түрде тоқтатылады. Мысалы, әскери қызметші жергілікті әскери басқару органы басшысының бұйрығы шыққаннан кейін Бірінші несиелік бюроға ақпарат түседі. Сол сәттен бастап несие төлемін есептеу тоқтатылады. Ата-аналар жағынан ешқандай әрекет талап етілмейді. Бәрі автоматты түрде тоқтатылады. Яғни, ата-ананың дәл осы мәселе үшін әскери комиссариатқа баруының қажеті жоқ. Бірінші несиелік бюроға ақпарат түскеннен кейін екінші деңгейлі банктерге мәлімет бірден жолданады, - деді аға офицер.
Сондай-ақ, кезекті әскерге шақыру маусымы биыл күзде басталатынын еске салды.
- 13 ақпанда ҚР Президентінің Жарлығы шықты. Аталған құжат бойынша мерзімді әскери қызметін атқарған азаматтар наурыз-маусым аралығында әскер қатарынан босатылып, қыркүйек-желтоқсан аралығында жаңа лек шақыртылады, - деді Дәуренбек Шегебаев.
