Айтыс, беташар және арқан тарту: NU-да Наурыз мейрамы сән-салтанатпен тойланды

Университет кампусы әп-сәтте киіз үйлері, алтыбақандары, ойындары мен мерекелік дастархандары бар үлкен дәстүрлі ауылға айналды. Ұйымдастырушылар – қызметкерлер, профессорлар мен студенттік клубтар – келген қонақтарға жылдың басты оқиғасын көңілді өткізу үшін ғана емес, сонымен қатар қауымды қазақтардың мәдениеті мен дәстүрлерімен таныстыру, олардың шығармашылығын көрсету мақсатында түрлі бағдарлама дайындады.

Көктемгі фестиваль салтанатты концертпен басталды: NU оркестрі мен NU хоры көрермендерді дала музыкасы мен дәстүрлі ән атмосферасына сіңіріп, күннің шырайын келтірді. «Қазағым-ай», «Ата толғауы», «Сәлем саған туған ел» және т.б. шығармалар орындалды.

NU президенті доктор Вакар Ахмад ұжымды құттықтап, Наурыз мейрамы жаңарудың, береке мен бірліктің мерекесі екенін атап өтті:

«Бұл ерекше мереке ұлы елдің бай мәдени мұрасы мен дәстүрін көрсетеді, үмітті, келісімді және жаңа бастамаларды бейнелейді. Табиғаттың оянуымен көктем бізді дамуға, білімге, жаңалыққа ұмтылуға шабыттандырады. NU-да біз ынтымақтастық пен прогресс рухын бағалаймыз. Наурыз мейрамы әрқайсыңызға жаңа мүмкіндіктер, табыс пен береке әкеліп, қоғамымызды жарқын болашақ жолында нығайта берсін. Наурыз құтты болсын!»

NU вице-президенті Қадиша Даирова биыл аталып өтетін ұлы Абайдың 180 жылдығын, сондай-ақ қысқа уақыт мерзімінде Орталық Азиядағы жетекші университетке айналған ЖОО-ның 15 жылдығын тойлайтының туралы айтты. Университет студенттерді кәсіби өмірге дайындауда Абайдың «Толық адам» тұжырымдамасын басшылыққа алады. Тұжырымдама адамды тек ақылды және батыл болуды ғана емес, сонымен қатар мейірімді және әділетті болуға үйретеді.

Кампуста NU мектептері және National Laboratory Astana «Ақ ниет ауылы», «Бақыт ауылы», «Береке ауылы», «Бірлік ауылы» және басқа да шағын тақырыптық ауылдар ұйымдастырды. Адамдарға қуаныш пен жарқын болашаққа сенім ұялататын дала көктемі мерекесіне тән іспетті университет қабырғасында көктемгі жаңару атмосферасы мен Наурыз мейрамының лебі толды! Киіз үйлерде бауырсақ, жент, палау, наурыз көже жеп, қолөнершілердің өнерін тамашалап, зергерлік бұйымдар сатып алып, қазақтың дәстүрлі ойындарына қатысуға мүмкіндік болды.

Студенттер беташар, тұсау кесу сияқты негізгі дәстүрлі ырымдарды ұсынып, қазақтың ән-билерін орындады. Ал қонақтар мен қатысушылар ұлттық киімдердің және аксессуарлардың алуан түрлілігімен таң қалдырды. Кеш соңында ең үздік ұлттық киімге арнайы сыйлық тағайындалды.