Балаларды ұрған павлодарлық тәрбиеші жұмыстан босатылды
Сәбилер бақшасындағы балаларға асқан қатыгездік көрсеткен тәрбиешінің үстінен полицияға 10 ата-ана шағым түсірген.
Өңірлік балалар омбудсмені Сәуле Шәкенова тәрбиешіден жапа шеккен балалардың барлығы сот-сараптамалық сараптамадан өткенін мәлімдеді. Қылмыстық істің материалдары Полиция департаментінің анықтау басқармасына түскен.
- Мекемеден алынған барлық видеоматериалдарды зерттеу жалғасып жатыр. Тәрбиешіден жапа шеккен балалардың саны көбейе түсуі мүмкіндігін жоққа шығармаймын. Күдікті ешқайда шықпау туралы қолхат жазып берді әрі ол жұмыс орнынан шығарылды, - деп хабарлады бала құқықтары жөніндегі өңірлік уәкіл Сәуле Шәкенова.
Бұған қоса балабақша меңгерушісі қатаң сөгіс алғаны айтылып отыр.
Ал жапа шеккендер арасында екі баланың ата-анасы өңірлік қолдау орталығына психологиялық көмек алу үшін жүгінген.
