BI Group, BAZIS-A компаниялары кірісін төмендетіп көрсеткен – Қаржы министрлігі
Елімізде ірі құрылыс компаниялары кірісін төмендетіп көрсетіп, салықтан жалтарған. Бұл туралы Қаржы министрлігі хабарлайды.
- Мемлекеттік кіріс органдары BAZIS-A компаниясына салық салынатын кірістердің 4,6 млрд теңге сомасына, сондай-ақ BI Group компаниясына 11,9 млрд теңгеге төмендетіп көрсеткені туралы хабарлама жолдады. Аталған жұмыс арнаулы салық режимдерін (АСР) қолданатын субъектілердің өзара есеп айырысуын талдау шеңберінде 2022 - 2023 жылдары жалпыға бірдей белгіленген тәртіппен жұмыс істеген компанияларға байланысты жүргізіліп отыр, - делінген хабарламада.
Ақпаратта айтылғандай, аталған компаниялар арнаулы салық режимін төлемді азайту үшін пайдаланған.
- Осы орайда камералды бақылау рәсімі салық төлеушілерге тексерістен бұрын табысты дербес түрде реттеп, салық төлеуге мүмкіндік береді, - деп хабарлайды Кірістер комитетінен.
Айта кетсек, күні кеше Үкімет басшысы Олжас Бектенов кәсіпкерлерді екі аптада салық сомасын әділетті түрде төлеуге шақырған еді.
– Қаржы министрінің ақпаратынан салық жүктемесін оңтайландырудың әртүрлі схемаларын қолдана отырып, жосықсыз кәсіпкерлердің өзін дұрыс ұстамайтыны көрінеді. Миллиардтаған айналыммен олар бюджетке өздерінің тапқан пайдасына мүлдем сәйкес келмейтін сомаларды төлейді. Бізде осындай ірі компаниялардың толық тізімі бар. Ол тізімде BI Group, BAZIS және басқа да көптеген ірі құрылыс компаниясы жүр. Экономиканың басқа салаларында жұмыс істейтін белгілі әрі танымал мейрамханалар, фитнес-клубтар және әртүрлі компаниялар бар, - деді Премьер-министр.
