Биыл күнбағыс алқаптарының ауданы 1,4 млн гектарға жетуі мүмкін
Биыл майлы дақылдар алқабының ауданын 3,3 млн гектарға дейін жеткізу жоспарланып отыр.
Премьер-министрдің орынбасары — Ұлттық экономика министрі Серік Жұманғарин Мәжіліс депутатының сауалына жолдаған жауапта биыл күнбағыс алқаптарының ауданы 1,4 млн гектарға жетуі мүмкін екенін айтты.
— Биыл майлы дақылдар алқабының ауданын 3,3 млн гектарға дейін жеткізу жоспарланып отыр. Оның ішінде күнбағыс алқабын 1,4 млн гектарға жеткізу үшін қосымша 121,2 мың гектарға тұқым себу көзделген, — деп жазады Серік Жұманғарин.
Айта кету керек, Жерге орналастыру жұмыстары жөніндегі мемлекеттік институттың мәліметі бойынша, елімізде 29,9 млн гектар жер тозған. Салдарынан топырақ құнарлылығы 17% төмендеп, суармалы алқаптардағы сортаңды жерлер 35-37% артқан.
— Егіс алқаптарын қысқарту мәселесіне келсек, негізінен бидай жекелеген түрлеріне арналған алқаптар мен су көп тұтынатын дақылдардың алқабын азайтуға көңіл бөлеміз. Сондай-ақ, майлы, бақша, жемшөп сияқты табысы жоғары дақылдардың алқабын кеңейту жоспарланған, — делінген жауапта.
