Елорданың бас имамына қатысты видео таратқан азаматқа 700 мың теңге айыппұл салынды
Елорда тұрғыны әлеуметтік желіде зәулім үйдің видеосын жариялап, ол Астана қаласының бас имамына тиесілі деген ақпарат таратқан, бірақ ол расталмай шықты.
Астана қаласының әкімшілік құқық бұзушылықтар жөніндегі мамандандырылған ауданаралық соты әлеуметтік желіде жала жапқаны үшін Б. есімді азаматқа қатысты істі қарады.
Б. есімді азамат әлеуметтік желілерде зәулім үйдің видеосын жариялап, оның халықтың қайырымдылыққа берген қаражаттарына салынғанын және зәулім үй Астана қаласының бас имамына тиесілі екенін айтқан.
- Cотта Б.-ның өзге азаматтың ар-намысы мен қадір-қасиетіне және беделіне нұқсан келтіретін мәлімет таратқанын анықтады. Сот отырысында құқық бұзушы кінәсін толық мойындап, үйдің кімге тиесілі екенін, оның қандай қаражатқа салынғаны оған белгісіз екенін түсіндірді. Сонымен қатар бейнежазбаны қаралым үшін жариялағанын айтып, өкініш білдірді, - деп хабарлайды елорда соты.
Жәбірленуші айыптыны заң бойынша жазалауды сұрады. Сондай-ақ құқық бұзушылық фактісі іс материалдарымен, әкімшілік құқық бұзушылық туралы хаттамамен, бейнежазбамен және жәбірленушінің арызымен расталды.
- Сот қаулысымен Б. Әкімшілік құқықбұзушылық туралы кодекстің 73-3-бабының 2-бөлігі бойынша әкімшілік құқық бұзушылық жасағаны үшін кінәлі деп танылып, оған 180 АЕК (707 760 теңге) мөлшерінде айыппұл салынды, - делінген хабарламада.
Сот қаулысы заңды күшіне енген жоқ.
