Енді МӘМС-пен қамтылмағандар ақысыз онкологиялық скринингтен өте алады
Мәжілістің жалпы отырысында денсаулық сақтау саласына қатысты заң қабылдады.
Бұл құжат 2024 жылғы 25 желтоқсанда Парламент Мәжілісінің жалпы отырысында бірінші оқылымда мақұлданған еді. Бүгін заң екінші оқылымда талқыланды. Заң жобасы артық заңнамалық регламенттеуді болғызбауға және денсаулық сақтау жүйесін жетілдіруге бағытталған құқықтық нормаларды көздейді.
Мәжілістің Әлеуметтік-мәдени даму комитетінің мәліметіне қарағанда, депутаттар құжатты талқылау барысында оның нормаларын едәуір пысықтады. Бұл ретте есту қабілеті бұзылған адамдарға әлеуметтік қолдау көрсету қадамдары қарастырылған.
Сонымен қатар, халықтың нысаналы топтарын скринингтік зерттеулермен толық қамтуды қамтамасыз ету ескерілген. Заңда тегін медициналық көмектің кепілдік берілген көлемі аясында көрсетілетін қызметтер тізбесіне онкологиялық ауруларды ерте анықтауға скринингтік зерттеулерді енгізу ұсынылды.
— Денсаулық сақтау министрлігінің қарамағындағы ғылыми-зерттеу институттарына резидентура даярлау бағдарламалары бойынша, ал бейінді бағыттар бойынша докторантура даярлау бағдарламалары бойынша медициналық жоғары оқу орындарымен бірлесіп дербес оқыту құқығын беруге бағытталған түзетулер енгізілді, — деді депутат Дәулет Мұқаев.
Оның айтуынша, құжатты талқылау аясында депутаттар бас бостандығын шектеу түріндегі жазаға сотталған немесе шартты түрде сотталған адамдардың құмар ойындарға қатысуына тыйым салуға, сондай-ақ букмекерлік кеңселер мен тотализаторларды жарнамалау бөлігінде заңнаманы қатаңдатуға бағытталған түзетулер енгізді.
Сонымен қатар бұл заңға қатысты депутат Асхат Аймағамбетов түсінік берді.
— Бүгін өте маңызды түзетулер қабылданды. 3,5 млн адамға жақсы жаңалық деп айта аламын. Неге? Медициналық сақтандырумен қамтылмаған 3,5 адам бар. Оларда онкология бойынша скринингтен өту құқы жоқ, яғни бұл адамдарды ешкім қабылдамай отыр. Ал скринингтен өтпегеннен кейін, онкологиялық ауруды ерте кезеңде анықтау қиынға түседі… Енді МӘМС аясында қамтылмаған 3,5 адам ақысыз түрде онкология бойынша скринингтен өтуге мүмкіндік алып отыр, — деді А. Аймағамбетов.
Атап айтқанда, осы құжат аясында қаралатын мәселелердің кеңеюін ескере отырып, оның тақырыбы «Қазақстан Республикасының кейбір заңнамалық актілеріне денсаулық сақтау, ойын бизнесі және артық заңнамалық регламенттеуді болғызбау мәселелері бойынша өзгерістер мен толықтырулар енгізу туралы» деп өзгертілді.
