Ерлан Ақкенженов Александр Новакпен кездесті
Мәскеу қаласында Қазақстан Республикасының Энергетика министрі Ерлан Ақкенженов Ресей Федерациясы Үкіметі Төрағасының орынбасары Александр Новакпен кездесу өткізді.
Кездесу барысында тараптар отын-энергетика кешеніндегі екіжақты ынтымақтастықтың өзекті мәселелері мен перспективаларын, сондай-ақ энергетика саласындағы өзара тиімді іс-қимылды одан әрі дамыту мүмкіндіктерін талқылады.
Ресей мен Қазақстан арасында стратегиялық әріптестік пен тату көршілік қарым-қатынастар қалыптасқан. Отын-энергетика кешеніндегі ынтымақтастық екіжақты күн тәртібіндегі негізгі бағыттардың бірі болып табылады және көпжылдық бірлескен жұмыс тәжірибесіне негізделген.
Кездесу соңында Ерлан Ақкенженов Қазақстан Республикасының Президенті Қасым-Жомарт Тоқаевтың атынан Александр Новакқа II дәрежелі «Достық» орденін табыстады. Бұл награда қоғамдағы өзара келісімді сақтауға бағытталған жемісті жұмысы, екі халық арасындағы бейбітшілік, достық пен ынтымақтастықты нығайтуға қосқан үлесі үшін берілді.
