Ертең шорт-тректен әлем чемпионаты басталады

ҚР Туризм және спорт министрлігінің хабаралуынша, биыл спортшылар 500, 1000 және 1500 метрге жекелей қашықтықта жарысады. Сондай-ақ ерлер – 5000, әйелдер – 3000 метрге эстафетада жүлделерді сарапқа салады. Бұдан бөлек аралас эстафета бойынша да жарыстар өтеді.

Әлем чемпионатында шорт-тректен ел намысын ерлерден Абзал Әжіғалиев, Денис Никиша, Әділ Ғалиахметов, Мерсаид Жақсыбаев, Глеб Ивченко, әйелдерде Яна Хан, Зейнеп Құмархан, Ольга Тихонова, Малика Ермек және Алина Әжіғалиева қорғайды.

Дүбірлі дода 1976 жылдан бері ұйымдастырылып келеді. Тұсаукесер жарысты АҚШ-тың Шампейн қаласы қабылдады. Ал Бейжің құрлық біріншілігін осымен үшінші мәрте өткізгелі жатыр.

Айта кетсек, былтыр Нидерландтың Роттердам қаласында өткен әлем чемпионатында Денис Никиша 500 метр қашықтықта күміс жүлдегер атанып, әлем біріншілігі тарихында ел қоржынына алғашқы жүлдені салған еді.