Қарақалпақстандағы көтерілісті сыртқы күштер жылдар бойы дайындап келген – Мирзиёев

Қарақалпақстанда шілде айының басында орын алған тәртіпсіздіктерді Өзбекстанға дұшпандық танытқан шетелдік күштер жылдар бойы дайындаған.
⠀
Бұл туралы Өзбекстан Президенті Шавкат Мирзиёев 6 шілдеде өткен жиында айтты.
⠀
– Әрине, бұл шаралар бір-он күнде ұйымдастырылған жоқ. Оларды деструктивті сыртқы күштер жылдар бойы дайындаған. Олардың басты мақсаты Өзбекстанның аумақтық тұтастығына қол сұғу және ұлтаралық қақтығыс тудыру, – деді Мирзиёев.
⠀
Оның айтуынша, Өзбекстанның дәйекті және тұрақты дамуына мүдделі емес әртүрлі сыртқы күштер «еліміздегі бейбіт жағдайға нұқсан келтіруге, азаматтарымыздың сеніміне кіріп, оларды адастыруға бағытталған арам пиғылды көздеген».
⠀
«Мұндай әрекеттер жалғасуы мүмкін» деп ескертті президент.

– Мен халқымызды елімізге дұшпандық танытатын осындай күштердің кез келген зұлым жоспарлары мен әрекеттеріне дер кезінде және өткір түрде шабуыл жасай алатынымызға сендіргім келеді, – деді Өзбекстан президенті.
⠀
Мирзиёев Қарақалпақстандағы тәртіпсіздіктер кезінде жақындарынан айырылған отбасыларға шын жүректен көңіл айтып, зардап шеккендердің тезірек сауығып кетуін тіледі.