Қазақстан астығы енді Мысыр және Араб елдеріне экспортталады
Еліміздің астығы Мысыр және Араб елдеріне экспортталуы мүмкін. Бұл туралы ҚР АШМ басшысы Айдарбек Сапаров айтты.
— Былтыр 26,8 млн тонна астық жиналды. Бүгінгі күні оның бәрі эловаторларға кіргізілген. Оның 8,2 млн тоннасы тасымалданды. Соның 4,8 млн тоннасы экспортқа шықты. Бұл жұмыс ары қарай жалғасуда. Жаңа нарықтар ашылып жатыр, Ресей арқылы да, Балтық елдері арқылы да экспортты жүзеге асырып жатырмыз. Қосымша, Мысыр, Араб елдерінің нарығына шығамыз деп жоспарлап отырмыз. Тиісті келісімшарт жасасуға 17-сі күні (ақпанның — ред.) сол жаққа сапарға шығамыз, - деді министр.
Ведомство басшысы ел қамбаларында әлі де мол астық қоры бар екенін атап өтті.
— 20 млн тоннаға жуық астық бар. Оның 12 млн-ын экспорттау керек. Атап өткенімдей, 4,8 млн-ы экспортталды. Бұл жұмыстар жалғасады, - деді ол.
Бұдан бөлек ол астықтар диірмендерге ұн өндіруге, сондай-ақ малдың азығы ретінде қолдануға да жіберіліп жатқанын атап өтті.
