Қазақстанға шетелден білімді адамдар жиі қоныс аудара бастады
Өткен жылы еліміздің сыртқы көші-қонында оң динамика байқалды. Бұл туралы Еңбек және халықты әлеуметтік қорғау вице-министрі Асқарбек Ертаев айтты.
- Сыртқы көші-қонның оң сальдосы 2 жыл бойы сақталды. 2024 жылдың қорытындысы бойынша көші-қон сальдосы +17,2 мың адамды құрады. Елге 30 мың адам келсе, 12,8 мың адам кетті. Елдер бөлінісінде көші-қон өсімі негізінен ТМД мен Қытай Халық Республикасына тиесілі. Ұлттық статистика бюросының статистикалық мәліметтеріне сәйкес білім деңгейі бойынша да оң сальдо байқалады, елге көбірек білімді адамдар келді. Бұдан басқа, техникалық мамандық бойынша 1 597 адам, педагогикалық мамандық бойынша 526 адам, ауыл шаруашылығында 151 адам, медициналық мамандықтар бойынша 295 адам келді, - деді ол Орталық коммникациялар қызметіндегі брифингте.
Оның дерегінше, ішкі көші-қонда да азаматтардың қозғалыс белсенділігінің өсуі байқалады.
- Ел шегінде қоныс аударушылар саны өткен жылдың кезеңімен салыстырғанда 1,5 есе. 2024 жылы ішкі көші-қонда 1 510 мың адам қатысты, оның 689,5 мыңы - өңіраралық қоныс аудару. Мегаполистер ішкі көшіп-қонушыларды тарту орталықтары болып қала береді. Мәселен, қаралып отырған кезеңде Астана қаласына тұрақты тұруға - 151 мың, Алматы қаласына – 129 мың, Шымкент қаласына 68 мың адам келді, - деді Асқарбек Ертаев.
