Орал әуежайынан қатынайтын рейстер саны артады
М.Мәметова атындағы Орал халықаралық әуежайынан наурыз айында қатынайтын рейстер саны артатын болады.
«Орал халықаралық әуежайы» ЖШС-ның баспасөз қызметінен мәлім еткеніндей, наурыз айында Орал қаласынан 6 бағыт бойынша тұрақты және чартерлік жолаушылар рейстері жоспарланған. Рейстерді 4 әуе компаниясы орындайтын болады.
Екі әуе компаниясы Шарм-эль-Шейхке маусымдық рейстерді жалғастырады. Бұлар – Scat және Fly Arystan.
- Еліміздің ішінде Астана, Алматы, Ақтау, Атырау қалаларына рейстер орындалады. Астана мен Алматыға рейстер күн сайын қатынайды. Наурызда Fly Arystan бұл қалаларға қосымша рейстерді бастайды. Осылайша, 3 наурыздан бастап әр дүйсенбіде Астанаға қосымша рейс бағыт алады. Сондай-ақ Наурыз мерекесі қарсаңында Астанаға тағы 6 қосымша рейс және Алматыға 2 рейс жолаушыларды тасымалдайды. 5 ақпаннан бастап Астанаға әр сәрсенбі күні ұшатын қосымша рейс іске қосылды, - деп хабарлады ведомстводан.
