Ірі компанияларда Қазақстандағы өндірушілерді қолдау үлесі өсті – Энергетика министрлігі
Энергетика вице-министрі Құдайберген Арымбек ірі компнияларда импортты алмастыру қарқынына түсінік берді.
- Мемлекет басшысы белгілеген міндеттер шеңберінде ірі мұнай-газ жобаларында елішілік құндылықты дамытудың тиімді жүйесін құруды қамтамасыз ету барысында министрлік ірі компаниялардың операторларымен, оның ішінде ҚПО-мен (Қарашығанақ Петролиум Оперейтинг) бірлесіп жер қойнауын пайдалану мақсаттары үшін қолданылатын тауарларды, жұмыстар мен көрсетілетін қызметтерді сатып алу кезіндегі елішілік құндылықты арттыру және отандық өндірушілерді қолдау бойынша тұрақты негізде жұмысты жалғастырып отыр. 2024 жылдың қорытындысы бойынша ТШО, НКОК және ҚПО-ның тауарлар мен көрсетілетін қызметтерді жалпы сатып алу сомасы 3,7 трлн теңге болды. Тауарлар, жұмыстар және көрсетілетін қызметтердегі жергілікті қамтуға 1,9 трлн теңге тиесілі. ҚПО үш ірі оператор арасында сатып алудың барлық көлемінің 16%-ын алып отыр, - деді Құдайберген Арымбек Мәжілістің Экология мәселелері және табиғат пайдалану комитетінде отандық өндірушілерді қолдау мен импортты алмастыру тақырыбын талқылау кезінде.
Оның айтуынша, ҚПО-да 2023 жылмен салыстырғанда тауарларды, жұмыстарды және көрсетілетін қызметтерді сатып алу көлемі бойынша жергілікті қамту үлесінің өсу серпіні бар. Соның арасында тауарлар бойынша 2023 жылғы 10,6%-дан 2024 жылы 18,2%-ға дейін айтарлықтай өсім байқалды.
- 2024 жылдың қорытындысына қарағанда, ҚПО-ның тауарларды, жұмыстарды және көрсетілетін қызметтерді сатып алуының жалпы көлемі 485,7 млрд теңге болды, оның ішінде жергілікті қамту үлесі 315 млрд теңге сомасына 64,9 пайызға жетті, - деді вице-министр.
Сонымен қатар ол 2024-2029 жылдарға арналған тауарлардағы, жұмыстардағы және көрсетілетін қызметтердегі жергілікті қамтуды дамытудың бекітілген бағдарламасына тоқталды. Бұл бағдарлама былтыр желтоқсан айында қабылданды. Осы ретте тауарлардағы, жұмыстардағы және көрсетілетін қызметтердегі елішілік құндылық үлесін арттыру ескерілген. Яғни 2025 жылдан бастап тауарлар бойынша 18%-дан 2029 жылға дейін 30 пайызға жеткізу керек.
Атап айтқанда, Мәжілістегі отырыста Қарашығанақ Петролиум Оперейтинг бас директоры Марко Марсили Қазақстандағы өндірушілерді қолдау жұмыстарына қатысты есеп берді.
