Сайланған әкімдердің 60%-ы бұрын мемқызметте болмаған – Бозымбаев «Әкімдер мектебі» жайлы
Елімізде сайланған аудан, ауылдық округ әкімдерінің 60%-ы бұрын мемлекеттік қызметте жұмыс істемеген. Сондықтан ауыл әкімдерін қайта даярлау бағдарламасының іске қосылуы орынды. Бұл туралы ҚР Премьер-министрінің орынбасары Қанат Бозымбаев айтты.
— Бәрімізге мәлім, 2021 жылдан бастап енгізілген ауыл әкімдерін сайлау — еліміздің маңызды реформаларының бірі. Бұл қадам азаматтардың жергілікті басқаруға белсенді қатысуын қамтамасыз етіп, әкімдердің жауапкершілігін арттырды. Содан бері 2,5 мыңнан астам ауыл әкімі сайланды. Сайланған әкімдердің 60%-ы бұрын әкім болып немесе мемлекеттік қызметте жұмыс істемеген. Олардың арасында әртүрлі кәсіп иелері, түрлі партия өкілдері бар. Бір сөзбен айтсақ, әкімдер корпусы едәуір жаңарды. Осыған орай, бүгінгі күні ауыл әкімдерін қайта даярлау бағдарламасының іске қосылуы орынды және дер кезінде қабылданған шешім деп санаймын, - деді ол Мемлекеттік қызмет істері агенттігінде бағдарламаның ашылуына орай өткен баспасөз мәслихатында.
Еске салсақ, елімізде ауылдық округтердің 95%-да әкім сайланды. 2021 жылғы шілдеден 2024 жылғы желтоқсанға дейінгі кезеңде 2176 ауылдық округте 2 566 әкім сайланды.
Бүгін елімізде сайланған ауыл және аудан басшыларын оқыту басталды.
Мемлекет басшысы бұған дейін «Әкімдер мектебі» жобасын іске қосуды тапсырған еді.
