«Сергек» елордадан кетіп жатыр: қаладағы камераларды БАӘ компаниясы басқарады
Астанадағы бейнебақылау жүйесінен «Сергек» кетіп жатыр. Оның орнына жаңа жүйені БАӘ компаниясы енгізеді. Бұл туралы елорда мәслихатының кезектен тыс сессиясында Астана қаласы Цифрландыру және мемлекеттік қызмет басқармасының басшысы Дидар Сүлейменов мәлім етті.
- 2017 жылы «Сергек» жобасы жүзеге асырылды. Биылдың 13 наурызында «Көркем Телеком» компаниясымен келісімшарт мерзімі аяқталады. Мемлекет басшысының тапсырмасы аясында және жобаны одан әрі дамыту тұрғысында G42 холдингіне кіретін Presight халықаралық компаниясымен елорда үшін жасанды интеллект негізінде қалалық инфрақұрылымды басқарудың жобалық шешімін іске асыру жұмысын атқардық. Жаңа жобаны қалыптастыру кезінде қазіргі қолданыстағы жүйенің кемшіліктері ескерілді, - деді Дидар Сүлейменов.
Оның айтуынша, жаңа жобада аппараттық-бағдарламалық кешеннің басым бөлігі үздіксіз жұмыс істеуін қамтамасыз ету үшін тұрақты электр энергиясын қосу қарастырылған. Сондай-ақ бейне түсірілімнің үздіксіз берілуін қамтамасыз ету бағытында бейнебақылау камералары оптикалық байланыс желісіне қосылады.
- Жаңа жоба бейне түсірілім ағынын таратудың бірыңғай жүйесін қамтамасыз етеді. Қазіргі инфрақұрылым жаңа жеке серіктестің басқаруына беріледі, бұл қазіргі жүйенің үздіксіз жұмыс істеуін қамтамасыз етеді. Жобада 22 мың жалпы бейнебақылау камерасы, қиылыстарда 732 аппараттық-бағдарламалық кешен, желілік учаскелерде 470 аппараттық-бағдарламалық кешен, сонымен қатар бейне талдаудың 35 түрі қарастырылған. Жоба аясында деректерді өңдеу орталығы ұйымдастырылып, кез келген оқыс оқиғаға жедел әрекет ету үшін жедел коммуналдық қызметтерді біріктіретін бірыңғай ситуациялық орталық қамтамасыз етіледі, - деді басқарма басшысы.
Оның сөзіне қарағанда, жоба 2030 жылға дейін жоспарланған. Бірыңғай ситуациялық орталық құрудың арқасында адамдар көп жиналатын орындарды 100% бейнебақылаумен қамтамасыз ету арқылы қауіп-қатерлерге жылдам әрекет ету мүмкіндігі болады. Ал жасанды интеллектіні қолдану жол қозғалысын бақылауды оңтайландыруға және жол қауіпсіздігін арттыруға, қалалық қызметтердің жұмысын жақсартуға ықпал етеді.
- Жеке серіктестің инвестициясы 53 млрд теңге. Жоба толығымен жеке серіктестің өз қаражаты есебінен қаржыландырылады. Бұл ретте қазақстандық компаниялардың қатысуы жұмыс көлемінің 60 пайызын қамтиды, - деді Дидар Сүлейменов.
