ШҚО-да балаларды буллингтен қорғау үшін арнайы чат-бот іске қосылды

Өңірде Telegram мессенджерінде «URPAQ» чат-боты жұмыс істеп тұр. Бұл жоба балаларды буллингтен қорғауға, құқық бұзушылықтың алдын алуға және психологиялық көмек көрсетуге бағытталған.

— Чат-ботты қолдану ыңғайлы болу үшін сілтемесі бар QR-кодтар (@VKO_URPAQ_BOT) мектептерде, мемлекеттік мекемелерде және халық көп жиналатын орындарда орналастырылған. Сонымен қатар ата-аналар чатына да жіберілген. Белсенді түрде насихаттаудың нәтижесінде қолданушылар саны 11 274-ке жетті, — деп хабарлады облыс әкімдігінен.

Жоба іске қосылғаннан бері чат-бот арқылы 178 хабарлама қабылданды:

• 36 — шұғыл көмек сұрау (SOS);

• 33 — буллинг (кемсіту, мазақтау) туралы шағымдар;

• 65 — психологпен сөйлесуге сұраныс;

• 19 — зорлық-зомбылық туралы деректер;

• 18 — бопсалау фактілері;

• 7 — дінге қатысты сұрақтар.

Чат-боттың көмегімен екі буллинг оқиғасының алдын алуға және жасөспірімдерге вейп сатқан Telegram-арнаны бұғаттауға мүмкіндік туды.