ҰБТ-ға өтінім қабылдау және өткізу мерзімдері өзгереді
«Ұлттық бірыңғай тестілеуді өткізу қағидаларын бекіту туралы» бұйрыққа өзгерістер мен толықтыру енгізілмек. Ғылым және жоғары білім министрінің аталған өзгерістер енгізілген құжаты ашық НҚА порталында жарияланды.
Қоғамдық талқылауға шығарылып отырған құжатқа сәйкес, алғаш рет қағидаларға академиялық адалдық ұғымы енгізілмек. Бұл - ҰБТ тапсыру кезінде әр тестіленушінің мінез-құлқын анықтайтын моральдық-адамгершілік нормаларының, принциптері мен құндылықтарының жиынтығы, оның ішінде алдау, көшіруден аулақ болу, академиялық стандарттарды, адалдық пен принциптілікті ұстану.
Сонымен қатар ҰБТ-ға қатысу үшін өтініш білдіріп, көрсетілген күні тестілеуге қатыспаған болса, тестілеу өткізілетін күндері аудиторияда (қағаз форматта тестілеу тапсыру тіліне сәйкес) орын болған жағдайда және мынадай дәлелді себептер бойынша ҰБТ-ны өткізу кезеңінде келесі күндердің бірінде қатысу мүмкіндігі алғаш рет берілмек:
- денсаулық жағдайы бойынша № ҚР ДСМ-175/2020 бұйрығымен бекітілген № 026/е нысанына сәйкес дәрігерлік-консультациялық комиссияның қорытындысы не амбулаториялық картадан немесе тестілеу өткізілетін күнмен сәйкес келетін ауру тарихы бар үзінді көшірмесімен медициналық карта болған кезде;
- «Жалпы білім беретін пәндер бойынша республикалық және халықаралық олимпиадалар мен ғылыми жобалар конкурстарының (ғылыми жарыстардың), орындаушылар конкурстарының, кәсіби шеберлік конкурстарының және спорттық жарыстардың тізбесін және оларды іріктеу өлшемшарттарын бекіту туралы» Қазақстан Республикасы Білім және ғылым министрінің 2011 жылғы 7 желтоқсандағы № 514 бұйрығымен бекітілген (Қазақстан Республикасының Әділет министрлігінде 2011 жылы 27 желтоқсанда № 7355 тіркелген) республикалық және халықаралық олимпиадалар мен ғылыми жобалар конкурстарына (ғылыми жарыстар), орындаушылар конкурстарына, кәсіби шеберлік конкурстарына және спорттық жарыстарға қатысқан жағдайда.
Мұнан бөлек, электрондық форматтағы ҰБТ-ға қатысу үшін онлайн режимде құжаттар қабылдау уақыттары да өзгереді:
- күнтізбелік жылғы 20 желтоқсан мен 30 желтоқсан аралығы;
- 10 сәуір мен 25 сәуір аралығы;
- 25 шілде мен 5 тамыз аралығы.
Электрондық форматтағы ҰБТ өткізу мерзіміндегі өзгерістер мынадай:
- күнтізбелік жылғы 1 наурыз бен 11 сәуір аралығы;
- 10 мамыр мен 10 шілде аралығы.
Күнтізбелік жылғы 10 мамыр мен 10 шілде аралығында ҰБТ тапсыратын тұлғалар үшін бейіндік пәндер комбинациясын өзгертуге жол берілмейді.
